حكاية النرفزة السورية...الشابة!!!

[ندعوك للتسجيل في المنتدى أو التعريف بنفسك لمعاينة هذه الصورة]

ياشباب...ليش النرفزة ..ليش التعصيب حبيباتي؟!!

ليش بس نعصب منسب ومنلعن ....حكومات ومسؤولين وقوانين؟!!

ليش بقمة غضبنا منصرخ ومنشتم هالبلد ..ويلي عايش بهالبلد..ويلي لسه بدو يعيش بهالبلد؟!!

ليش عند اول موقف..ضدنا مندعي أنو الحياة كلها ضدنا..وأنوكرامتنا ولقمة عيشنا وطموحنا ضدنا..ومنعصب؟!!

ليش ليش هالتوتر والتعصيب والنرفزة؟

قبل ماتنبحت حبيبي الشاب السوري وقبل ماتجعر بوجهي..حاسمع وحشوف أنا وأنت وهنن مشاهد من حكاية نرفزة سورية...شابة!!!

اكشن...

[ندعوك للتسجيل في المنتدى أو التعريف بنفسك لمعاينة هذه الصورة]

المشهد الاول

مواطنا بهالمشهد شاب حباب...لاعب كرة قدم ..رضيان بانهزامته ومابحياته تعدت أبعد وأصعب

أحلامه الميداليات وأكيد مو الدهبيات...عايش حياته ورضيان مايكون عندو حتى تلفزيون يشوف

فيها المباريات...وقبلان هالإنسان ببوط البزابيزالضيق و الهفتان...

مستأجر غرفة مع رفقاته ..يلي حالفين يحطوا حطامو قدامه إذا بتحطون صاحبة البيت عالباب

لأنو دايماً بيتأخر بدفع حصته من الأجار...

صاحبنا رايق لا بعصب ولاهو من عيشته متضايق...لحتى سمع بأذنه وهو بالسرفيس إعلان..

وشافه بتلفزيون الجيران...وقرأ عنه بالبوسترات يلي بالطرقات..إعلان بقول باختصار:

((احلامك ماعم تصير واهدافك ماعم تصيب...مع 9/6 كل شي رح يتغير..استنانا حتى حياتك تتغير )).

صاحبنا ضل يحلم ويتخيل وبالسادس من شهر تسعة بلش يتأمل صار يشوف حالو هداف عالمي

ومشهور..والبلد فيه معجوق ومخفوق...وأحلامه شطت ومطت وعلى الأرض ماعادت حطت..

ومرة صار يشوف حاله ملك النطحة ومرة يتخيل نفسه أبو شوطة ركنية مابتخيب بالمرة..

ولما أجى اليوم الموعود...والروزنامة اعلنت بغرفته انو 9/6 صار موجود... ركض هالزلمة على

تلفزيون الجيران يبوس الإيدين حتى يشوف مشهد من سهرة يوم الأحلام..بدو يفهم شو القصة

وشلون حياته دبل تيك بدها تتغير...وبعد مادار بهالشوارع حتى يشوف سر التغير وكمالة هالإعلان

الخطير...مالقى غير إعلان عن علكة فيها بتربح صورة و فوقها طقة مسكة...

طبعاً صاحبنا جن...عصب كفر..وسب..هالبلد يلي بداعب أحلام شبابها بعلكة ومحرمة وبس..

قتل بحاله وضرب جيرانو ورفّس برفقاته وببوط البزابيز فج مدربه وحكام مبارياته..

وكل الناس تساءلت شو يلي غير طبعه..وليش صار نرفوز وعصبي وألفاظه زفرة وأخلاقه ضيقة

وعسرة ..؟!!

[ندعوك للتسجيل في المنتدى أو التعريف بنفسك لمعاينة هذه الصورة]

المشهد الثاني

من عند صاحبنا اللاعب بعدنا..ومن صراخه ماعدنا تحملنا..مشينا مشينا على هداك الرصيف كان

في صوت بنت عم تصرخ بالولي..وتعيط وتسب هالدنيا والساعة يلي أجت فيها بنت...

وعم تلعن وتلّحق لهالمجتمع...يلي بحب العتمة...وعم تلعن حظها يلي جابها عهالبلد العجبة يلي

بحاسبه الواحد على وضوحه ..وبصادر أفكاره وحقوقه...

الجيران من حوليها كان عم يلوموا وعم يقولوا الله يعين أهل هالبنت..شو بضلها خلقها ضايقة ومتل

الجنية بتعيط وبضلها عم تنط ومابتحط...قربنا أكتر من هالباب...وفتنا لجواة الجدران وشفنا

هالصبية وحيدة بالمطبخ عم تبكي..عم تدعي على حالها بقصف عمرها مع أنها صبية حلوة كتير

وبأول عمرها..طلعنا من الحيطان وفتنا لجواة قلبها وإحساسها..لقينها رايقة ولذيذة وأخلاقها دمثة

وظريفة...بس من وقت أخدت البكالوريا أهلها صاروا بدهون يجوزها ومرتين غصب من عنها

خطبوها وكتبوا كتابها ودهوروها وفسخت خطبتها مرة والمرة التانية اتطلقت وتوترت من لعي

الناس عصبت..ولماقررت تدرس بالجامعة قلها أبوها بخاف عليك من المجتمع وثقتي فيك خليها

على جنب...ووين ماراحت أخوها لازم يوصلها وشو ماقالت بتصير مفزلكة ومغرورة وماحدا

عاجبها ...وإذا إجاها عريس عجبها بيقولولها فقير ومنتوف ومابناسبها ...وإذا شي مرة انحكى

بجمالها بصيروا بنقوا عمومها وأخوالها وبذكروا أهلها أن هالبنت لازم تتحجب...وغصب عنها

بصير كل شي بحياتها حجابها دراستها وزواجها ...ولسه أهلها بيسألوا شبها بضل موترة ..تضرب

على هالخلقة ماألأمها؟!!!

والناس بتزيدها وبتنق وفوق راسها بتزن..بنت بأول عمرها وبهالاخلاق أي من هيك ماحدا عم

ياخدها ...ومشان هيك أهلها ماعم يتفاهموا معها...أي الله يعينها على هالأخلاق شو نكدية وعلى شو

كل هالعصبية؟!!!

[ندعوك للتسجيل في المنتدى أو التعريف بنفسك لمعاينة هذه الصورة]

المشهد الثالث

انحرق قلبنا على هالبنت ..ومن زعلنا عليها بكينا قهر..وهالقصة موقصتها لحالها ..هي قصتها

وقصة مليون و ألف ومية من رفقاتها وأخواتها وبنت خالتها وخوالها ..ونحن ماشين شفنا شب

مرتب وعيونه عم تضحك وباتجاه سيارته التكسي عم يتوجه ..وقبل مايركب ويسوق اطلع عالسما

وقال يارب تعطينا خير هالنهار...ركب السيارة وحط غنية حلوة لفيروز وصار يمشي بهدوء..حتى

شاورتلوا زبونة وطلعت معه هي وولادها وأكلوا الشاورما وشربوا العصير بهالسيارة ولما طلب

منها بهدوء تنتبه مشان الولاد مايكبوا يلي بإيدون والدبق يلزق بغيرون..صرخت بوجه وقالته نحن

موطالعين ببلاش...

وبعد مانزلت طلع معه رجال كبير ضل ينقروا حكي عن هالجيل..ووقاحته وجآرته وعدم تقديره

للكبيروبعد ماوصلوا على سيدي مقداد هو ولحمته وخضرته والغراض رفض الحجي يعطي عداد

ونص ..وضرب الباب بوجه وتركوا لهالشب يفج راسو بالدركسيون فج...وبعدها طلعت معه وحدة

متعلمة وعالاتحاد النسائي متسهلة.. وطول الطريق كانت عم تتذمر من ريحة السيارة

وعم تبربر ولماحاول يفهمها شو القصة وأنو الذنب موذنبه بهالجرسة..بهدلته واتهمته بالثرثرة

وبنص الطريق نزلت ومادفعت ولا ربع ورقة..وبهاللحظة بيجي شرطي المرور وبيضربوا

لهالمسكين مخالفة مدري على شو ..بقوم هالشفير بعصب ودمو بفور وبهستر وبصير بسوق متل

المجنون وبشغل أغاني حكيم وبعليها فوق اللزوم..ولماحدا بيقلو شوهاد.؟

بيصرخ بيعيط وبسب وبجعر وبيقول كلام مشفر مابقدرخبركون منه غير حكي مقطع مو موصل:

اي هي بلد توووت مابيمشي معها إلا ولاد

التوووت ...تفه..أبو..اخت ...الحالة....الوضع...المواطن....الوطن....

(وقبل مايشحطوا لهالأخ حأشحط حالي من جنبو...وروح شوف حدا أروق منه).


[ندعوك للتسجيل في المنتدى أو التعريف بنفسك لمعاينة هذه الصورة]

المشهد الرابع

الشرطي يلي خالفه لبطل المشهد الثالث و يلي الله أعلم وين أراضيه صارت....كان مبين عليه

معصب ومحروق نفسه ومتعتر...خفنا نقرب منه يضربنا ..فشوي شوي ومتل السلالين باتجاهه

اتسلحبنا..

كان واقف عم يتنهد وبصوت واطي عم يسب هالشغلة وهالقرف و عم يلعن.

أول مرة بحس اديشه مسكين وحظه معفر ..كان عم يحكي عن حرامية ومرتشين كبار ..

وكان عم يسب الصحافة والمسلسلات يلي مابتتقاوى إلا على شرطي المرور...هالغلبان.

كان عم يعد ويحسب أجرة الغرفة ومصروف مدارس الأولاد..وضرب على راسه وتذكر أن حماته

وأمه وابن عمته حيجوا من الضيعة ليناموا عنده هالشهر كمان..

ضرب ..جمع..حسب...وقال لسه بينقصني شي ست ..سبع ..تسع (خمس وعشرينات).

ورجع هون سب الصحافة والمسلسلات وذكر أسماء ناس وشخصيات ماحدا بيقدر يجيب سيرتها

ولا سيرة الملايين يلي بضبها بجبيتها...

ورجع تحسر على هال25 يلي الناس شهرّت فيها وماعادت تركتها...ولّحق لكل هالناس من أكبر

راس لأصغر راس..وبعدين صفر بالصفيرة وهجم على تكسي تاني ..وبهالوقت سألت حالي إذا هو

عم فش خلقه الضيقان بهالشفيرة يلي اتعس منه ياحرام..

مين منون بينلام؟


[ندعوك للتسجيل في المنتدى أو التعريف بنفسك لمعاينة هذه الصورة]

المشهد الخامس

كنت لسه واقفة عم بسال حالي...ومعصبة من هالأوضاع وزعلانة على هالأشخاص. وعلى

حالي..وفجاة بيظهر بوجهي شخص أجنبي وبيعرف يحكي عربي...قرب مني وسألني ..وسط

ضجة وهرج ومرج..وبالوقت يلي الناس فيه عم تعيط ع بعضها البعض.. وعم تتخانق مع دبان

وشها من الصبح..سألني هالاجنبي: ليش أنتوا الشباب السوريين بضلوا عصبين..ليش مابتعرفوا

بعضكون تحبوا ليش مابتحاولوا تبتسموا؟

سؤاله وجعني وزعجني ويمكن عصبني..التفت لعنده وقلتله:

لما اتنين بحبوابعضون ...ومن كل قلبون....

ولما بتمنحون هالشام سما وشمس وورد ليحبوا...

ولما بتحرمون من سقف غرفة يحتضن حبون...

ولما بهاجروا ..بيفارقوا..وبيبكوا....

ولما الشام بتخونون ..وبتعطيون ضهرها...

ولما بصيروا بيكرهوا الشام....وسماها وأرضها..

ولما منفقد الحب الكبير...لوطن ماعطانا أقل من حقنا..

شوبدكون يطلع منا ؟

لك شووووووووووو؟

وهالمنظوم الأجنبي مو طلع بيحكي عربي بس مابيفهم ولاحرف من الجعران العربي!!!!

[ندعوك للتسجيل في المنتدى أو التعريف بنفسك لمعاينة هذه الصورة]

الغضب الساطع آت؟!!

نغضب ونتوتر ونصرخ ..و(منعيط)

وبكل برود بالريمونت كنترول منقلب

منسمع خبر عن بناتنا واخواتنا يلي عم يغتصبون كل يوم بالعراق..عرب واميركان

منسمع عن شبابنا واخواتنا يلي عم بدبحوا بعضون بفلسطين ولبنان

شوتمسحنا...ليش هون بالذات مامنفور ومنرفز...وبالحل منفكر

ولسه بتقولولي ..الغضب الساطع آت..طيب وانا كلي إيمان

بس من زمان ونحن منقول بدها تشتي مولازم تبلش تغيم ياشباب؟

[ندعوك للتسجيل في المنتدى أو التعريف بنفسك لمعاينة هذه الصورة]

صحيح الموضوع طويل بس الو معاني كتيرة وها الاشياء مو صايرة في سوريا بس في كل العالم تقريبا
شكرا على مجهودك رنون
اقبلي مروري وتحياتي

بس فعلا شي بنرفز
تصوري كمان واحد يوم الاثنين اغتنى وصار بين الاغنيا ترتيبه الثالث
يوم الثلاثاء الصبح مات في حادث

ياخي قمة في النحس والنرفزة
شكرا على الموضوع المميز وافكارك القيمة نون الاخت الحلوة

شكرا "اسرار القلوب "و أمير العشاق "

على المداخلة الميزة والرد اللطيف

الله لا يحرمني هالطلة

انا شخصيا ازا صارلي متل الشب لكان هادئ وبعدين صار معصب يمكن ما اصير معصبه بس اكسر كل شي قدامي هههه
يسلمو ع الموضوع مو كتير طويل عادي
سلامي لكي رنون